Shayır (Yusupov)
Dártimdi óytip qozǵama,
Júregim, saǵan ırzaman.
Men de aytayın azǵana,
Sen de tıńla bir zaman.
Aytarıń bar ma qánekey,
Qolımnan kelse ayar-em.
Saǵan hesh hazar bergizbiy,
Shalqaqlatıp qoyar-em.
Men saǵan emes, bálki sen,
Maǵan tınım bermiyseń.
Adamzattıń dártinen,
Suwǵarmasam, shólleyseń.
Jamanlıq kórseń demigip,
Jaqsılıq izlep terleyseń.
Qara suwǵa semirip,
Qayǵısız shaǵlap júrmeyseń.
Qayǵırǵanıń el isi,
Biypárўa dáwran súrmeyseń.
Kelse ilham perisi,
Ólgenińdi bilmeyseń.
Dawlaspayıq, kel qáne,
Ayıplap birew-birewdi.
Ózińdi qolǵa al, qane,
Ornıń seniń girewli.
Alma, dostım kewilge,
Suwıspasın aramız.
Bul bes kúnlik ómirde,
Ne bolsaq, birge bolamız.
Dawlasıp endi hálekseń,
Kóp penen kórgen toy, jora.
Júrekpiseń - júrekseń,
Qınqıldıńdı qoy, jora.
Betińdi qashan qayırdım?
Kisige tagne etpe dım.
Sonda saǵan shayırdıń,
Júregi bol deppedim...